भारतीय नाकाबन्दीका बीच खुल्ने भो तातोपानी नाका, के के आउँदैछ ?

काठमान्डौ
भारतीय नाकाबन्दीले आहत बनेका नेपालीहरुका लागि खुशीको खबर छ । भुकम्पले झण्डै ६ महिना अघि अबरद्ध बनेको नेपालको उत्तरी छिमेकी चीनसँगको तातोपानी नाका बढीमा तीन दिन भित्र खुल्ने भएको छ । नेपाल तर्फ झरेको पहिरो हटाएर बाटो तयार पारिएपछि तीन दिनपछि मालबाहक गाडीहरु एकतर्फी रुपमा संचालन हुनसक्ने बताईएको छ ।

नेपालमा संविधान जारी भएपछि दक्षिणी छिमेकी भारतले अघोषित रुपमा नाकाबन्दी लगाएर समस्या उत्पन्न भएकोमा बैकल्पिक व्यवस्थाका लागि उत्तरतर्फको अबरुद्ध नाका खोल्न सरकारमाथि दबाब परेको हो ।
काठमाडौदेखि सिन्धुपाल्चोकको बाह्रविसेसम्म अहिले यातायात संचालन भईरहेको अबस्थामा बाह्रविसेदेखि तातोपानिको लिपिङसम्म २६ किलोमिटर सडक सरकारी तथा ब्यापारिक संघसंस्थाहरुको सक्रियतामा खोलिदै छ । चीन तर्फको मितेरी पुलसम्मको सडक भने चालु भईसकेको छ ।
तातोपानी नाका खुले पनि त्यहाँबाट नेपाललाइृ तत्काल चाहिएको डिजल, पेट्रोल आयात हुन भने सक्ने छैन तर भुकम्पपछि अडकिएका कन्टेनरहरुमा लादिएका लत्ता कपडा, ईलेक्ट्रोनिक लगायतका सामानहरु भने राजधानी ल्याउन सकिने भएको छ । दशै नजिकिएकाले तातोपानी नाका खुल्दा खासाबाट सामान झिकाएर काठमाडौमा ब्यापार गर्नेहरुलाई धेरै राहत पुग्ने देखिएको छ । नेपालले पहल गरेमा पेट्रोलियम पदार्थ पनि आयात हुनसक्ने तर समय लाग्ने बुझिएको छ ।
नेपालको आग्रह पछि चीनले पनि केरुड. नाका चालु गर्न पनि तदारुकता देखाएको छ ।
चीनले भारतको नाकाबन्दीलाई मध्यनजर गर्दै नेपाललाई सबै प्रकारको सहयोग गर्न तयार रहेको धारणा सार्वजनिक गरिरहेको छ ।
-मेरो  लगानी