कोरियाको छुसकमा नेपाली कलाकारहरुको भिड

देवेन्द्र सम्बाहाम्फे, दक्षिण कोरिया .

सोल-सलनाल र छुसक जस्ता कोरियाली पर्वहरु नजिकिएपछि यहाँ आउने नेपाली कलाकारको ताँती लामो हुनेगरेको छ । यी  दुई पर्वमा ३/४ दिन बिदा हुने भएकाले बिभिन्न संस्थाहरुले संस्कृतिक कार्यक्रम आयोजना गर्दछन । यस्ता कार्यक्रमहरुमा प्रस्तुति दिन उनीहरु आउने गरेका हुन् ।

पर्सी सेप्टेम्बर ७ तारिखबाट शुरु हुने यो बर्षको छुसकमा पनि नेपाली कलाकारको ताँती लामो बनेको छ । यसपाली  चार वटा सास्कृतिक कार्यक्रम आयोजना गर्न लागिएको छ । छुसकको पहिलो दिन नेपाल मगर संघले 'नेपथ्य विथ लिटिल डान्स क्वीन तेरिया' नामक लाइभ कन्सर्ट आयोजना गर्दैछ । नेपालका आदिबासी जनजातिको सहयोगार्थ सो कार्यक्रम गर्न लागिएको हो । नेपथ्य समुहले यसअघि २००४ र  २०१० मा आफ्नो प्रस्तुति दिएको थियो । नेपथ्यसंग  जीटीभी लिटिल डान्स  तेरिया मगरको साथ रहने छ । तेरिया कोरिया पहिलोपल्ट आउन लागेकी हुन् । कन्सर्टलाई अझ स्मरणीय बनाउन उत्कृष्ट साउण्ड सिस्टम र स्टेज डेकोरेसन गरिएको आयोजकले जनाएका छन् भने नेपथ्य ब्यान्डका कलाकारहरु हिजै कोरिया छिरेका छन् |

त्यसै दिन धरान–कोरिया सहयोग समितिले 'बुढा सुब्बा सांगीतिक सौगात' पस्किन लागेको छ । यो सौगातमा हट र सेक्सी लोक गायीका ज्योती थापा मगर, हास्यकलाकार विल्सनबिक्रम राई, गायिका बिष्णु  चेम्जोङ र गायक सबिन राईले आ-आफ्नो कला र गलाका माध्यमबाट दर्शकलाई मनोरन्जन दिनेछन् । यहाँका नेपालीहरुले गेटअपका कारण अहिले चर्चामा रहेकी  गायिका थापा मगरको बिशेष प्रतीक्षा गरेका छन् । चारै जना कलाकार भोलि आईपुग्ने जनाइएको छ |यो कार्यक्रमको उद्धेश्य भने धरान शहरको दृश्यावलोकन गर्न टावर निर्माण गर्ने रहेको छ ।

छुसकको दोश्रो दिन सेप्टेम्बर ८ मा पनि दुइटा कार्यक्रम रहेका छन् । खोटाङ सेवा समितिले ‘खोटाङ-हलेसी सांगीतिक सौगात भाग-३’ प्रस्तुत गर्न लागेको छ । यसका लागि गायकहरु राजेश पायल राई, प्रमोद खरेल,रेवत राई तथा गायिका कोमल वली, मिलन अमात्य, समला राई , तयाँहाङमा राई र नायिका पृयंका कार्की आउने भएका छन्  जिल्लाको स्वास्थ्य क्षेत्रमा सहयोग गर्ने उद्धेश्यले कार्यक्रम आयोजना गर्न लागिएको आयोजकको दाबि छ । यसै दिन लुम्बिनी अन्चल अस्पतालको सहयोगार्थ रुपन्देही सम्पर्क समितिले ‘ रमाइलो लुम्बिनी रमझम’ प्रस्तुत गर्न लागेको छ । यसका लागि समितिले गायक रामजी खांड र गायिका मन्जु पौडेललाई आमन्त्रण गरेको छ । यो रमझममा तेरिया मगरले पनि नृत्य प्रस्तुत गर्नेछिन् भने स्थानीय 'द एक्स बेण्ड' ले लाइभ प्रस्तुति दिनेछ ।