दक्षिण कोरियाको थेगुमा एक नेपालीको मृत्यु

निकुञ्ज तिवारी - सउल,दक्षिण कोरिया -
दक्षिण कोरियामा हिजो विहान (सोमबार) एक नेपालीको मृत्यु भएको छ । थेगुस्थित वेएगान इल्फोङ नजिकै मोवाइलको हाउजिङ कम्पनीमा कार्यरत अशिम ताम्राकारको सुतिरहेको अवस्थामा मृत्यु भएको बताइएको छ ।

खोटाङ्गको दिक्तेलबाट करिब १९ वर्ष अगाडि रोजगारीका लागि कोरिया आएका ४० वर्षिय ताम्राकारको मुटुको गति रोकिएर मृत्यु भएको स्थानिय अस्पतालले जनाएको संगै कार्यरत मृतकका ज्वाई दिपक महतले बताए । करिब २ वर्ष अगाडि इपिएस मार्फत आएका महत ३ महिनादेखि संगै कार्यरत थिए ।

‘दुई महिनापछि नेपाल ‘घर’ जाने तयारी गरिरहनुभएको थियो । उहाँ १९ बर्षदेखि घर जानुभएको  थिएन । अकस्मात् हिजो यस्तो घटना भयो ।’ नाताले ज्वाई महतले भने ‘मेरो रात्रीको काम उहाँको दिउँसोको काम थियो । बेलुका खाना खाएर म काममा गएँ, दाई बिहान नउठेपछि कम्पनी व्यवस्थापकले बोलाउन पठायो । उहाँले ढोका भित्रबाट बन्द गर्नुभएको रैछ । ढोका फोरेर भित्र हेर्दा उहाँ सुतेको सुतै हुनुहुन्थ्यो । हिटरको तापले कोठा गुम्म थियो । झ्याल–ढोका बन्द थियो ।’

नाताले ज्वाई पर्ने दिपक महतका अनुसार जेठान मृतक अशिम ताम्राकार ११ वर्षदेखि उक्त कम्पनीमा कार्यरत थिए । सो कम्पनीमा नेपाली उनिहरु दुई जनामात्र कार्यरत थिए ।

घटनाको औपचारिक जानकारी नेपाली दूताबासले परराष्ट्र मन्त्रालयलाई मंगलबार बिहान पठाइसकेको श्रम सहचारी अनिलकुमार गुरुङले जानकारी दिए । अविवाहित मृतकका आमा, भाइ र दुई बहिनी छन् ।