नयाँ श्रम सम्झौता अगस्टबाट आउने l

निकुञ्ज तिवारी -सउल ,कोरिया l
- ईपीएस भाषा परीक्षा पास गरी श्रम सम्झौताको प्रतीक्षामा रहेका नेपाली कामदारका लागि आउँदो अगस्ट पहिलो साताबाट पुनः श्रम सम्झौता आउनेछ । कोरिया सरकारले यस वर्षका लागि छुट्याएको पहिलो र दोस्रो चरणको कोटा समाप्त भएपछि तेस्रो चरणका लागि नयाँ कोटा वितरण गरेको हो ।
श्रम तथा रोजगार मन्त्रालयले सन् २०१३ का लागि निर्धारण गरेको ईपीएस कोटा अब १५ हजार बाँकी छ । प्रथम र दोस्रो चरणका लागि छुट्याएको ३१ हजार कोटा समाप्त भएपछि बाँकी तेस्रो र चौथो चरणको १५ हजार कोटा बाँकी रहेको हो ।

साना तथा मझौला घरेलु उद्योगहरूमा आवश्यक अदक्ष कामदार आपूर्ति गर्न कोरिया सरकारले सन् २०१२ का लागि ६२ हजार कोटा निर्धारण गरेको थियो । औद्योगिक उत्पादन क्षेत्रका लागि छुट्याइएको १५ हजार कोटामध्ये तेस्रो त्रैमासिकको ७ हजार ५ सय कोटा आउँदो साताबाट वितरण गर्ने मन्त्रालयले जनाएको छ । कृषि, मत्स्यपालन, कन्स्ट्रक्सन र सेवा क्षेत्रको कोटा पहिलो र दोस्रो त्रैमासिकमै समाप्त भइसकेकाले पछिल्ला दुई चरणमा यी क्षेत्रमा कामदारको माग छैन । मन्त्रालयले मुलुकको आर्थिक अवस्था र आन्तरिक श्रम बजारको मूल्यांकनका आधारमा कोटा निर्धारण गर्छ ।
मन्त्रालयका अनुसार जुलाई ३ देखि १० सम्म रोजगारदाताबाट निवेदन आह्वान, जुलाई १२ देखि १९ सम्म रोजगारदाता छनोट, जुलाई २२ मा योग्य रोजगारदाताको नामावली प्रकाशन र जुलाई २४ देखि २६ सम्म छनोटमा परेका रोजगारदातालाई श्रम अनुमति वितरण गरिनेछ । यसपछि मात्र कामदारसँग श्रम सम्झौता हुने भएकाले प्रतीक्षा सूचीमा रहेकाहरूले तीन साता पर्खनुपर्ने छ । चौथो त्रैमासिकको ७ हजार ५ सय कोटा भने अक्टुबरमा वितरण गरिनेछ ।
ईपीएसका अनुसार २०६८ साउनमा लिइएको तेस्रो भाषा परीक्षा पास १५ हजार ६ सय ७ जनाले पास गरेका थिए । सन् २०१३ मा ५ हजार ९ सय नेपाली कामदार कोरिया ल्याइने मानव संसाधन विकास (एचआडी)ले जनाएको छ । रोजगार तथा श्रम मन्त्रालयका अनुसार एकपटक भाषा परीक्षा उत्तीर्ण परीक्षार्थी रोजगारीका लागि दुई वर्षसम्म योग्य हुन्छन् ।