कोरियामा पुन: तलब बढ्ने संकेत

नमस्ते नेपाल कोरिया सम्बाददाता

    सोल , २१ मार्च  २०१५ l

दक्षिण कोरियामा न्यूनतम ज्याला वृद्धि गर्न चौतर्फी दबाब सँगै चालु आर्थिक वर्षको ज्यालामा थप केही प्रतिशत बढ्ने संकेत देखिएको छ । 

देशको आर्थिक तथा मूल्यवृद्धि लगायतका विभिन्न सुचकांकको आधारमा न्यूनतम ज्याला वृद्धि गर्न माग गरिएको हो । माग अनुरुप तलव बृद्धि भए मुलबासी र आप्रवाशी न्यून आय भएका करिव २७ लाख भन्दा बढि श्रमिक लाभान्वित हुने खबर कारोबार रास्ट्रिय दैनिकमा उल्लेख छ l

राष्ट्रपति पार्क गुन ह्ये प्रशासनले उपभोक्ता मूल्यमा आएको वृद्धिले न्यून आय भएका मजदुरको जीवनयापनमा कठिनाई उत्पन्न भएको धारणा राख्दै यसवर्ष थप ७ प्रतिशत सम्म  ज्याला वृद्धि गनुपर्नेमा जोड दिएको छ । कोरियाका उपप्रधान तथा अर्थमन्त्री चुई ख्वाङ ह्वानले ज्याला वृद्धि गरिने बताएका छन् । गत साता फोरममा मन्त्री चुईले श्रमिकवर्गमा बजार मुल्यको नराम्रो प्रभाव परेको बताएका छन् । 

रोजगार तथा श्रम मन्त्री लि की क्वाङले कोरियन श्रम बजारको आय असमानतालाई निरुत्साहित गर्न सामान्य मजदुरहरुको न्यूनतम ज्यालामा वृद्धि गर्नुपर्ने आवश्वकता रहेको औलाएका छन् । मजदूर संगठनहरुले आर्थिक तथा मूल्यबृद्धि र श्रम बजारको आय असमान रहेको जनाउदै आधारभूत तलव बढाउन माग गरेका छन्। त्यस्तै पुरुष कामदारको दाँजोमा महिला कामदारहरुको औषत ज्यालामा कमि देखिएको ओइसिडिको प्रतिवेदनमा पनि  उल्लेख छ ।

कोरियामा बजारमुल्य वृद्धिमा उच्चता आएसगै  त्यसले निम्न आय भएका श्रमिकहरुको जीवनयापनमा कठिनाई उत्पन्न भएको बताइएको छ l

यस वर्षको पारिश्रमिकमा ४० घण्टा कामगर्ने कामदारले न्यूनतम मासिक ११ लाख ६६ हजार २ सय २० वन पाउनेछन  (१ लख ५ हजार ७ सय ४१ रुपैयाँ) । त्यस्तै हप्तामा ४४ घण्टा काम गर्ने कामदारले १२ लाख ६१ ह्जार ८० वन पाउनेछन  (१ लाख १४ हजार ३ सय २० रुपैयाँ) ।

दैनिक बढ्दो मूल्यवृछि र गुणस्तरीय जीवन र श्रमिकहरुको राय अनुसार ज्यालाको खाका तयार पारेको श्रमिकको हक अधिकारमा कृयाशील ट्रेड युनियनहरुले बताएका छन् । तलब वृद्धिले यहाँ कार्यरत आप्रवाशी कामदार र अब भित्रिने नयाँ जनशक्ति लाभान्वित हुने छन् ।

कोरियाले सन् १९८८ देखि ज्याला निर्धारण समिति मार्फत प्रत्येक वर्ष न्यूनतम ज्याला निर्धारण गर्दै आएको र यस वर्ष २०१५ का लागि  न्यूनतम  ७.१ प्रतिशतले ज्याला बढाएको थियो  ।