कोरियाको सेवल जहाज घटनाका पीडित भोक हड्तालमा

मञ्जु गुरुङ | सउल, दक्षिण कोरिया

कोरियामा गत अप्रिल २५ तारिख समुन्द्रमा डुबेको सेवल पानी जाहाजमा मरेकी किम यू मिनकी पिता किम यङ ओ भोक हड्तालमा उत्रेका छन् । ४२ दिनदेखि निराहार अनसनमा बसेका किमको स्वास्थ्य कमजोर देखिन थालेपछि ३८ औ दिनमा उनलाई अस्पताल भर्ना गरिएको छ । हाल उनलाई अस्पतालमा स्लाइन पानी दिए पनि अन्न खाएका छैनन् । उनी सेवल घटनाको छुट्टै विषेश कानुन बनाउन माग गर्दै भोक हड्तालमा बसेका हुन् ।

सउल जहाज घटनाको विस्तृत अध्ययन गरी सम्लग्न सम्पूर्ण दोषीलाई कारवाही गर्न विशेष कानुन बनाउन मृतकका परिवारहरुले माग गर्दै आएका छन् । जुलाई १४ बाट घटनमा मृतकका परिवारहरु १४ जना भोक हड्तालमा बसेका थिए । तर विस्तारै एक एक जनाले हड्ताल छोड्दै गए पछि हाल उनी मात्रै लगातार आमरण अन्सनमा बस्दै आएका छन् ।

किमले आमरण अनसन बसेको ३८ औ दिन राष्ट्रपति पार्क गुन हेसंग टेवल वार्ता गर्न राष्ट्रपति भवन जान खोज्दा प्रहरीद्धारा रोकिएको थियो । विपक्षी दलका नेता र विभिन्न ट्रेड युनियन, प्राध्यपक, कानुन व्यवसायी , साहित्यकर्मी, कलाकार र विद्यार्थीलगायत संघ संगठनको सहयोगमा उनीहरुको आन्दोलन जारी छ । अहिले राष्ट्रपति भवनको अघिल्तीर रातभर उनीहरु धर्ना र नारा जुलुसमा उत्रेका छन् । तर पनि सरकारले कुनै सुनुवाई गरेको छैन् ।

आमरण अनसनमा बसिरहेका ४७ वर्षिय किमले केही दिन अघि रोमबाट कोरिया आएका धर्म गुरु पोपलाई भेटी शान्तिको प्राथना गरिदिन ज्ञापनपत्र समेत बुझाएका थिए । पोपले पनि उनको शिरमा हात राख्दै आर्शिवाद दिएका थिए । आमरण अनसनमा जारी किमले अस्पतालको शैयाबाट नै आफ्नो माग प्रति कुनै सुनुवाई नभई भोक हड्ताल तोडेमा छोरीको लागि नालायक पिता हुनेभएकाले बाच्नुकै कुनै अर्थ नरहेको प्रतिक्रिया दिएका छन् ।